真味源

營業中

休息中

觀塘做完嘢，本來坐紅Van返荃灣先食晚飯，經過門口見到餐牌，主打燉湯，依排有兩聲咳，又想飲返碗湯，一於試試佢。餐廳唔算太大，大約有七張四人枱，地方光猛乾淨整潔，坐低侍應俾咗杯麥茶，麥茶好香，幾好飲。川貝海底椰燉鱷魚肉 $60燉湯一人份量原燉盅上，上菜時非常之熱，都要等咗一陣先至可以飲到落口，材料充足，眼見有川貝、鱷魚肉、沙參、海底椰、排骨，入口清甜，冇味精，燉湯火候時間非常充足，排骨入口即溶。豉蒜白鱔蒸飯 $58 （籠仔蒸飯加配任何燉湯減$10)蒸飯熱辣辣蒸起，白鱔都有6至7件，當然唔會太厚切啦，因為價錢問題，蒜蓉蒸白鱔味道好夾，少少豉油加蒜蓉攪拌埋啲白飯，唔會太鹹味道啱啱好。因為我有嗌咗一個燉湯，蒸飯平咗$10，所以$ 48有一個蒸白鱔飯，都幾抵食。