地點：尖沙咀金馬倫道
菜式：日本烤肉店，主打石燒牛，即係用熱石黎燒牛。
餐牌：星期日都有午市套餐，有23款，好多選擇，豐儉由人。可以跟餐加小食或者飲品。落單用QR code。
鹽蔥牛舌伴牛五花定食 $108 另加一
牛舌有四圓片，而牛五花就有三大片。牛舌都好腍，唔會太韌。牛五花就更加好味，又腍又多汁，牛味又濃，唔洗點汁都好味，唔算太肥。
嚴選封門柳伴一口牛定食 $108 另加一
一口牛同封門柳各四件同四片。嚴選封門柳係圓片，都好腍又多汁。一口牛有咬口，牛味都唔錯。
等服務員先加酒精，然後等兩分鐘就加牛脂係張牛油紙上面，之後就可以自己動手燒。石燒好處係無油煙，較網燒健康，不過會比較慢少少，適合慢慢燒慢慢食。枱上面仲有一次性圍裙比我地。
兩份定食牛肉都伴有椰菜絲沙律，大菇半隻同車厘茄半粒。大菇可以燒到脆皮，好香菇味，正。
附上牛脂。
定食包雜菜沙律同車厘茄加胡麻醬，麵豉湯（入面有豆腐，昆布同蔥花），同熱白飯一大碗。
更附有兩款醬汁，我鍾意惹味而鹹度適中既蒜香芝麻醬。
加左兩款小食。
和風脆豆腐 跟餐加$18 另加一
和風脆豆腐一大件切開兩邊好易食。豆腐炸得脆皮而入面嫩滑，面頭灑上木魚花，白芝麻粒同蔥花。下底有椰菜絲沙律，加左少少酸汁好味道。
和風芥末脆牛舌 跟餐加$15 另加一
和風芥末脆牛舌一客7條，牛舌真係脆皮，入面好淋，牛舌味重，伴有芥末沙律醬同椰菜絲，味道唔錯。
雪芝茉莉蜂蜜芝士奶蓋 跟餐加$18 另加一
雪芝茉莉蜂蜜用膠杯上。色水呈淡黃色，味道唔會太甜，帶少少苦，芝士奶蓋唔少。記得撈好芝士奶蓋一齊飲就正啦，又滑又香，完全唔覺苦，芝士味同茶味好夾。
草莓乳酸 跟餐加$18 另加一
草莓乳酸都係用膠杯上，入面有新鮮士多啤梨，飲品氣量適當，甜度適中。好解渴。
食物質素都唔錯，座位舒適，有私隱度，今餐都好滿足，而價錢並唔貴。
