正宗上海生煎皇 (已結業)

同朋友拎婚紗相順手食晚飯，係婚紗店隔離街見到呢間正宗上海生煎包門口好多人排隊開餐，見價錢幾抵食，就係咁排埋一份。等左唔係好耐，約10分鐘已就座，係等位期間侍應叫我地係門口揀定食咩畫定，入去一坐底就有野食。果不其然，真係坐底無兩分鐘已有野食送到。我地點左個上海粗炒、四川擔擔麵、上海生煎包(四個)，同一籠四只既灌湯小籠包，再搭兩杯豆漿。個上海粗炒炒得好入味，熱炒上仲出緊煙，每條烏冬都燒得著色匀均入味，牙白菜仔滿爽口，冬菇炆得好淋再炒，菇香味好出。枱面有樽辣醬，出乎意料的不辣反帶微甜香口，食粗炒點呢個醬一流。四川擔擔麵麵條好彈牙札實，湯底混合四川醬味濃，有點花生醬味，令香味提升，不膩濟，正。個上海生煎包不得不推，簡直係王者之選，外面煎得黃金色，外層好脆口，咬落去爆汁的，好燙口。有圖有真相，外層金脆，內裡肉汁味濃，必食之選。灌湯小籠包有四件，熱騰騰上枱外皮好薄包住內裡湯汁，可以點黑醋配食，但其實不點醋食都一流好味道。整體來說，價錢抵食&好味道，兩個主菜加兩個小食再黎兩杯豆漿，兩個人食都係兩百蚊雞有找，仲要飽到反晒艇，又抵又好食，係快靚正之選。