祥興記上海生煎包 (已結業)

祥興記生煎包由初初開店到依家都係人流不斷，不過未有機會一試。今次難得經過係有口痕嘅衝動，作為一小份下午茶剛剛好！ 由於人均消費$20以上先可以堂食，所以外賣生煎包係店門外企位食。幾欣賞佢嘅外賣盒，好似漢堡包盒咁，幾新潮。$28四隻小小嘅生煎包定價係同區小店嚟講都算高，但真係要食過先知值唔值。平時食開嘅生煎包係煎個包底，哩到係煎個包頂。 細細咬一口，千祈唔好放開口，因為包住嘅肉汁會一湧而出，要慢慢吸哂d汁先。肉汁好鮮甜。跟住先加入醋食。小小嘅生煎包裝住嘅肉汁比我預期嘅多。個包頂因為煎過所以十分香脆，而且個皮真係幾薄，比小籠包厚少少而己。没有厚嘅外皮，就更加能夠品嚐到内餡嘅鮮味。黑白芝麻同葱更有畫龍點睛之效，令生煎包更香口。生煎包水準真係不錯，係街頭小食中嘅心水之選。