釣魚翁 燒鵝．海鮮飯店 (已結業)

好一個釣魚翁，今時今日可以煮得咁求其又是旦，以為啲客會食唔出其差劣，實在係極品：  乳豬：入到口，皮唔太脆、唔太肥、冇乜肉又無味，真係無味。原來豬有豬味並唔係必然的。  燒鵝：燒鵝皮燒得唔錯，唔太油膩，但燒鵝太瘦咬落又係冇乜肉，仲要係冇乜鵝味。所謂的招牌菜真係好一般。  龍蝦伊麵：隻軟殼龍蝦鹹到不得了，可能係長時間用味精醃製所致。咁重口味係咪因為要掩蓋龍蝦的雪藏味？？？就算係雪藏龍蝦，其實都可以煮得好食，煮到咁鹹都只可能係求其……伊麵的味道反而適中，幾好食，但麵的份量極極極少。  上湯菜膽：菜膽色暗軟身，入口完全係水味﹗應該係用清水烚熟浸咗好耐，再求其加上湯上枱就算。真係求其到一個點……  翠玉瓜炒唔知咩蚌肉：蚌肉煮得太耐，韌到不得了。翠玉瓜又係似用水白烚咗好耐好耐好耐，可以將翠玉瓜煮到唔脆都真係天才。  竹笙翅（羹？）：好地地一碗白色湯羹，居然入口係黑胡椒味，難食到……  以上為部分位列於母親節套餐菜式之內，平日的餐牌完全被消失，可以額外選擇的菜式極少，而且價錢一啲都唔平。  只可以講句：觀塘釣魚翁，燒鵝嘅價錢，蔗渣嘅味道，永無下次。  BLACKLISTED。  完。