德家日式燒肉店 (已結業)

呢間食店啱啱開嗰陣我成日幫襯，因為嗰陣價錢真係好抵，兩個人埋單三百幾，之後兩年冇嚟過，見團購$188，加每位$38服務費已經有升級Meun嘅安格斯牛，價錢都ok，即刻買，即刻訂埋枱。餐單大致同以前差不多，飲品類有多咗選擇，有自酙嘅hoegaarden，仲有熱飲，奶茶，朱古力，咖啡，甜品亦多咗細細件嘅蛋糕同和菓子選擇 。職員服務態度唔錯，到七點幾開始多人，有啲焗。不過二百幾一位食到安格斯牛同刺身，抵食。座位闊落舒適，唔會唔夠位擺食物。八張餐單，安格斯牛同埋刺身要另加錢，團購價包埋。自助區有沙律，前菜，丸類，烏冬，冷面等。各款前菜。甜蝦嘅賣相唔太好，頭有啲變黑，各類刺身中規中矩。安格斯牛係比較有牛味。但係我最鐘意係呢度嘅牛舌。佢哋醃好嘅肉都比較嫩滑。迷你甜薯加牛油好味，食完見有牛油剩唔浪費，喺自助區再拎啲加上去燒。一口甜蛋都唔錯，食得出一層層嘅蛋。牛油鮮菌就麻麻，燒完有啲乾。可花肉好味，入口唔會太肥膩。海鮮類車海老較好，蝦肉唔霉。各類飲品，好鐘意呢度啲奶茶好滑好香。蛋糕仔有七款，味道一般，另外有乳酪，同雪糕。