影片
更多
2016-10-25
3836 瀏覽
收工後有點差事要過嚟上環處理，加上老婆是夜約咗人傾功課，一支公就梗喺食埋先返屋企啦。醒起曾經晌蘇杭街有間賣亞洲特色麵食小店「Foxtail & Broomcorn」，嚟到先發覺已經轉為一間日本拉麵店，感覺有點可惜，小弟一向做人既來之，則安之，反正暑假初去完北海道到依家，都未有再食拉麵，就當今晚依一餐重溫吓拉麵嘅滋味。踏入店內，印象中跟之前嘅格局無變，最入嘅位置喺開放式廚房同吧位，近門口就有幾排枱櫈。裝修算喺簡約，木枱配木櫈，帶少少和風，環境比較光猛，出入通道又都做得比較闊落，而吧位下有掛勾同儲物籃，小弟一個就坐晌吧位靜靜地食麵。餐廳比較自助，枱上已放有一大壺冰水、玻璃杯，自己招呼自己；此外，餐具、紙巾亦放齊晌枱上，更備有幾罌伴菜：酸薑絲、辣芽菜、鹹高菜，口痕痕當前菜食又得，放落麵條拌勻食都得。一如大部分拉麵店咁，賣嘅拉麵款式都喺貴精不貴多，拉麵以外嘅單點料理，亦喺得三幾款。所以，一張落單紙就見晒店家嘅5款拉麵，以及相關選項，如叉燒肥瘦、麵條粗幼、硬度……等等。而單點料理就喺啲餃子、迷你丼飯。正當我想點個黑熊拉麵時，因為喜歡黑蒜吖嘛，店員推介新出無耐嘅「熟成昆布醬油拉麵」，喺期間限定嘅款
踏入店內，印象中跟之前嘅格局無變，最入嘅位置喺開放式廚房同吧位，近門口就有幾排枱櫈。裝修算喺簡約，木枱配木櫈，帶少少和風，環境比較光猛，出入通道又都做得比較闊落，而吧位下有掛勾同儲物籃，小弟一個就坐晌吧位靜靜地食麵。
餐廳比較自助，枱上已放有一大壺冰水、玻璃杯，自己招呼自己；此外，餐具、紙巾亦放齊晌枱上，更備有幾罌伴菜：酸薑絲、辣芽菜、鹹高菜，口痕痕當前菜食又得，放落麵條拌勻食都得。
一如大部分拉麵店咁，賣嘅拉麵款式都喺貴精不貴多，拉麵以外嘅單點料理，亦喺得三幾款。所以，一張落單紙就見晒店家嘅5款拉麵，以及相關選項，如叉燒肥瘦、麵條粗幼、硬度……等等。而單點料理就喺啲餃子、迷你丼飯。
正當我想點個黑熊拉麵時，因為喜歡黑蒜吖嘛，店員推介新出無耐嘅「熟成昆布醬油拉麵」，喺期間限定嘅款式，原來牆上已貼有海報介紹，落單紙背面就有詳細啲嘅介紹。當問及跟其他基本拉麵款式有咩分別時，除湯底唔同外，最大分別喺依一款期間限定喺用上曲麵，反正價錢差唔多，所以，試試無妨。順帶一提，店員話每隔兩個月左右佢哋就會出一款期間限定，所以，依一款熟成昆布醬油拉麵大概供應到去12月中左右，視乎食客反應再決定延唔延期。
熟成昆布醬油拉麵 $83湯頭以熟成昆布熬煮，再加入醬油而成，先呷番一口，感覺醬油味清香而不濁，怕豬骨湯太濃太餬口嘅人依款湯底可能幾啱佢口味；啲曲麵不俗，麵身算幾彈牙，帶點咬口，又耐浸，而且，份量亦不少。餸料包括半熟玉子、叉燒（可揀瘦梅頭叉燒或半肥瘦叉燒）、海草（海藻）、蔥花、有味筍、特製日本雲吞、紫菜，雞蛋做到溏心效果，凝香柔滑；瘦叉燒健康啲，但當然不及半肥瘦咁酥化油香啦，但健康少少我都喺揀咗瘦叉；有味筍就失望少少，唔喺小弟較鍾意爽口嘅做法，不過，就好有筍香，至於特製日本雲吞亦唔覺有咩特別，只喺普通豬肉雲吞，但就做得小巧的骰。
上文都講過，啲湯都真喺唔錯，所以，連湯都飲埋，碗底除見到熊仔標誌外，亦有一句日文，小弟本身就唔識日文，估大意都喺多謝光顧、多謝欣賞之類啩。
烏龍茶 $16個人認為店中較弱一環喺小食同飲品選擇少，小食就只有日式餃子一款，飲品都只喺以大路汽水為主，欠缺一啲亮點性。故只喺揀咗支烏龍茶，諗住解解油膩，不過，個湯底基本都唔油，叉燒又揀瘦嘅，所以，支茶就當清清喉頭、解解暑，都10月尾啦，仲27、28°C！
食完麵，見枱上有張意見書，俾客人對啲食物表達吓意見，如上文所言，希望將來小食同飲品增加多些少選擇。
睇見店內煮麵嘅師傅、店員都好年輕，招呼都好有禮，食完都有主動走嚟問問意見，細心聆聽小弟發噏風，希望佢哋繼續努力，保持住份雄心壯志，有機會再嚟試試佢個豬骨湯底。
張貼
