東歐餐廳

今日去港島區嘅薄扶林牧場，跟住落咗去中環試吓呢間東歐餐廳。餐廳佈置非常有特色，但枱與枱之間略為擠迫。兩個人，點咗五樣嘢。1） 東歐羅宋湯 - 羅宋湯同一般喺香港飲到嘅唔同， 呢個湯因為有紅菜頭嘅關係，成碗湯都係紅色，連啲薯仔都係紅色。 同埋加少量Sour cream， 味道特別， 算唔錯！2） 芝士餃子 - 呢度菜有少少古怪，個餃子係蒸嘅， 配Sour cream食！ 蒸餃加芝士餡料呢個組合有小小難接受， 口感好其怪。 3） 酸奶燉牛肉絲 - 個薯蓉唔錯，香滑得來有少少薯仔粒有少少咬口。而酸奶燉牛肉味道似咖喱同埋葡國汁之間，味道唔會太濃。 唔錯！ 4） 酥皮燴牛仔肉 - 牛仔肉煮到好鞋口， 個汁有小小古怪， 有啲薑嘅味道，有小小似一道奇怪嘅中菜！ 而嗰塊酥皮真係要改名， 一啲都嗰酥， 似普通一塊厚身嘅麵餅。5）地道香燒豬肋骨 - 呢個係我朋友見到隔籬枱叫咗覺得好吸引，所以後加嘅！ 個汁係黑椒汁嘅味道， 肉質又係好鞋口。呢餐飯兩個人食咗差唔多$880， 可能位置嘅問題所以價錢偏貴。成餐飯整體感覺係有特色嘅， 但個人認為每道菜嘅味道係好有阿媽喺屋企煮飯嘅感覺（偶有失手）！