新容記小菜王 (已搬遷) 新店位置

天下第一雞，叫得天下第一雞，果然天下第一，首先隻雞好重雞味，入口非常嫩滑，係嫩滑到即使係個胸部位置都完全唔會靭，跟住沙薑味就慢慢滲出，最重要係上枱嘅時候隻雞仲係熱辣辣㗎。啫啫芥蘭煲，個煲一上枱咋咋聲，離遠經已聞到佢傳嚟嘅香味，碧綠嘅芥蘭被爆過嘅肉碎蝦乾同埋蒜子所包圍，每一條都咁香口惹味。燒肉，呢度個燒肉真係有今生無來世，老闆話佢哋會將最好味嘅部份裁出嚟整呢一個燒肉，焗完第一次之後攞啲燒肉出嚟鬆針，跟住又再拎返入去焗多一次，所以個燒肉皮勁脆，脆得嚟又夠哂鬆化，一啲都唔會硬，而肉嘅口感方面比起出面食到嘅更加軟熟，絕對係我食過最好食嘅燒肉，wasabi 醬風格創新，值得一試，但係我始終鍾意點傳統嘅黃芥辣多啲。蒜香骨，蒜香骨蒜味香濃，帶有輕輕嘅南乳味道，外層炸得酥香之餘內裏肉汁豐富，餸飯餸酒兩相皆宜。雞蛋焗魚腸，爹哋一睇餐牌見到呢一款懷舊嘅小菜即刻心心眼，印象中我都好耐無食過啦，皆因呢啲咁傳統嘅嘢真係唔係度度都有得食，啲魚腸焗得好香，入口之後散發出強烈嘅回甘，連在坐嘅小女孩都連聲叫好。