燒蝦哈 (已結業)

我地一家人都鍾意燒烤，朋友介紹呢燒哈蝦開咗無耐可以去試吓，所以專程坐西鐵去錦上路，由西鐵站行去其實10分鐘內，都唔遠，不過記得係C出口，openrice 寫B出口會行多一段路，C出口轉右過馬路後，沿東滙路行過橋後轉入錦莆路，見到個停車場行入去就係啦！之前睇食評話呢度有上下兩層，不過問店員佢話之前打風上邊有損毁，而家剩返下層，唔使行上行落仲好啦。現場冇冷氣，不過有冷風機，如果夜晚嚟都唔會太熱。食物方面，呢間燒烤主打食大頭蝦，活生生任你捉，即夾即燒保證新鮮，確實真係幾好味，有啲仲好多膏添！其他食物都係一般嘅雞翼、豬牛羊、丸、腸等，另外都有一些蔬菜，例如金菇、粟米、三色椒、娃娃菜、一口番薯等等，我建議用店員提供嘅錫紙來做蔬菜包，因為就咁燒蔬菜會比較乾，做蔬菜包就可以保持濕潤，好味好多啊！不過菠蘿我就就咁燒，都好甜呢！呢度多包任飲，主要係紙包果汁、茶、或者罐裝涼茶爽、沙士等選擇。