重慶劉一手火鍋店 (已結業)

近排喺電台成日聽到呢間火鍋店嘅廣告，今日咁啱經過附近，就同友人去試試。醬料吧有好多款揀，最特別係有一小罐自家製嘅油提供。湯底我哋揀咗鴛鴦鍋，一邊揀咗招牌重慶麻辣鍋，而另一邊係椰子滑雞鍋。麻辣鍋雖然揀咗小辣，但辣味依然好勁。而椰子滑雞鍋味道好清甜，雞肉滑捋捋好好食。油炸鬼墨魚滑可以即食，外脆內軟幾特別。牛頸脊好重牛味，軟中帶韌好有口感！團圓鴨血有啲硬度唔會一夾即散，同麻辣湯式簡直絕配！羽衣甘藍好大塊，要煮耐啲先咬到。萵筍片就好鮮甜。鮮腐竹好重豆味，同椰子雞湯底好夾。叫咗一渣水果茶，好多料，有西柚、熱情果、檸檬等，味道酸酸甜甜好好飲，仲可以解辣。