地點：尖沙咀厚福街H8
菜式：港式火鍋店
餐牌：湯底，肉，配菜，麵，丸，滑，餃，菜，小食，刺身，活魚刺身，海鮮
美顏養生豆乳白鍋 $168 另加一
美顏養生豆乳白鍋賣相頂呱呱，奶白色湯底加上花瓣同杞子。中間有一朵用木瓜整成既花，好靚。個湯好清，不過又唔會無味，豆乳味超濃。下底有幾磚豆腐，滾得耐面頭會有一層豆皮。鍾意清淡人士可以考慮呢款湯底。
美國頂級牛小排 細 $198 另加一
美國頂級牛小排就算係細份量都好多，用冰鎮住上枱，仲有花瓣裝飾。牛小排果然係頂級，油花平均，有相當厚度，所以口感好好，又嫩口，質素好高。呢個價錢好抵食。
手打蝦滑 $88 另加一
手打蝦滑大概整到四大粒，果然彈牙，味道唔錯，面頭仲加上蟹籽。
野生竹笙 $98 另加一
野生竹笙一客五大條，好巨型，非常吸湯，好爽口。下底墊有紫椰菜絲同椰菜絲，食得唔好浪費。
唐生菜 $48 另加一
唐生菜一大兜，好抵食。
讚歧手打烏冬 $38 另加一
讚歧手打烏冬係幼身滑溜烏冬。
子薑皮蛋 $88 另加一
子薑皮蛋一客7片，皮蛋黃超滑，好好味，蛋白彈牙。中間有好多粉紅色子薑，少少辣，食落又酸又甜又辣，好開胃。面頭灑上白芝麻粒添味道。
炸芋頭 $58 另加一
炸芋頭一客8條，排得精美。食落唔會太油，少脆而入面好爽又帶啖啖澱粉。下底墊有一片生菜。
椒鹽粟米 $78 另加一
椒鹽粟米一客8件，我第一次食椒鹽粟米，廚師炸得個皮好脆而入面又真係粒粒粟米，面頭好多椒鹽，食落少少辣。下底墊有一片生菜。
烏龍茶，七喜 每款$20 另加一
叫左一人一支飲品，七喜附有獨立包裝飲管。呢度都有啤酒可以叫。
醬介 每位$20 另加一
自己係個架揀自己鍾意既醬料，提供足夠選擇。
餐廳座位舒適，餐具精美，冷氣好勁，呢餐特別鍾意美國頂級牛小排！小食都好好食。
