蝦麵店 (荃新天地) (已結業)

我一直都好鍾意食好濃好濃湯頭嘅麵，如果你同我一樣嘅話，呢間蝦麵店都幾適合你，佢哋個湯頭香濃到我喺門口等緊入座都已經聞到。我同朋友各叫咗一人套餐，包一個細份嘅麵、兩款小食、飲品。辣味蝦湯底 - 蝦肉肉片麵 $95 我揀咗少辣，menu上面提醒咗如果呢個辣味蝦湯底嘅麵揀少辣嘅話，蝦味會無咁鮮，的確比起我聞到其他人嘅蝦湯淡啲，但唔緊要，仍然係好香。麵底我揀咗摻摻，即係mix咗油麵同米粉一齊，口感豐富一啲。咖哩叻沙湯底 - 海鮮麵 $106 海鮮款式唔算多，份量由於係細碗，對男友人嚟講都偏細份，但勝在湯底濃郁，好有地道風味，豆卜吸收哂湯底後超正。五香滷肉配一口脆豆腐 $68 再加埋套餐小食：馬來香炸雞翼、馬來沙嗲雞髀肉串，呢四款入面，我最鍾意五香滷肉，外皮炸得香脆，裡面嘅肉應該混埋咗馬蹄，食落爽口，惹味而不膩。脆豆腐亦整得出色，乾身脆口，點埋醬食好比零食咁，另外嘅雞翼同雞串略嫌較乾，而且唔夠味。需加一服務費，埋單2人約$300。如果你鍾意睇我嘅食評，不妨關注我，支持吓我，謝謝你☺️💕