先滋先覺 (已結業)

又係睇到報紙介紹所以o黎試下，lunch time勁多人等位，主打係燒味，唔係傳統的燒味舖一定配白飯或粉麵，可以配滋味飯(紅米粟米飯)、福建麵、鴛鴦米任君選擇。我第一個舉手要叉燒滋味飯，之後同事再叫芝麻雞撈福建麵、油雞撈鴛鴦米(粉絲加米粉)同一碟燒腩燒鵝雙併，D份量唔細，好彩係大家share食。每人先送個例湯-紅蘿蔔菜乾湯，料十足，飲唔出有味精味，不過勁多油。叉燒好好食，大家都認為好過利苑tim，滋味飯是白飯較多，紅米同粟米好似係點綴形式。芝麻雞撈福建麵撈左d麻醬好香，雞絲已去晒皮，而福建麵外形似油麵，但較為彈牙好食。油雞撈鴛鴦米，油雞夠嫩滑有雞味，可能我o地食雞上脾的關係，汁唔多所以d粉絲同米粉都幾乾。另外雙併的燒腩，大家亦都讚好，皮脆肉嫩，皮與肉中間帶有少少肥同軟骨，怕肥的我都忍唔住食多幾舊。每人都叫左杯野飲，埋單都係$125，勁抵。大家都話值得翻炒。