倫哥火鍋私房菜 (已結業)

火鍋隱又黎啦，今個月冇打過邊爐，心癢癢勁想打，朋友推介這個刺身+雞煲+火鍋。朋友話食到雞煲其實已經飽飽地，佢講到咁誇張，當然要去食下，所以我地一早book 定枱去食。好彩有book 位，已經有9成滿座了，先來刺身，刺身非常新鮮，而且是厚切，赤蝦仲要勁大隻勁大隻呀！之後好快上雞煲啦，張枱紙倫哥會教你歎雞煲四步曲，每兩分鐘攪一次，共攪四次就食得架啦，一打開，雞煲醬汁超惹味，雞又滑又入晒味，食到一半再加入魷魚、豬皮、牛柏葉落雞煲，真係好惹味，飲埋杯啤酒真係一流啦。食完雞煲，餐廳會送你一碗黑糖冰涼粉，消暑解辣，清熱潤肺。之後好快就上埋火鍋，火鍋湯底是椰子雞，超濃椰子味道，個海鮮拼盤好大份，而且仲有不同款式海鮮，海鮮非常新鮮，而且隻隻都好大隻，亦有好多不同配料，有響鈴，炸魚皮，雲吞，餃子，丸，墨魚滑，蝦滑等等。我最鐘意食墨魚滑和蝦滑，墨汁味濃，而且有粒粒墨魚，而蝦滑，爽口彈牙，真係有粒粒蝦肉，夠足料。食完火鍋，餐廳每人送上一碗3.6牛乳燉燕窩，不算非常滑，但好香濃牛奶味。以一餐真係好飽好飽好飽，好滿足。