鮨文 (裝修中)

一直想食鮨文好耐啦，今日終於約埋朋友去食佢嘅OMAKASE。一坐低已經遞上一條熱熱地嘅毛巾俾我地抹手，暖立立好舒服，我地揀左呢個餐單，好期待！茶碗蒸入面有金箔，唔止賣相又靚又高貴，味道仲好好呀，蛋超級滑，又香，入面仲有菇同帶子，味道一流。青鯛魚刺身，薄薄三片好精瑩，食落有少少煙韌，好鮮，加上少少岩鹽吊味，魚味更鮮， 而且擺碟都好靚好有心思。池魚和章紅，池魚好爽口，魚油味好重，章紅加入柚子吊味，魚味更出。日本蠔，蠔好肥美，口感又爽，食完一隻好想再食呀。赤鮑，煮到稔度啱啱好，咬落仲係爽嘅，食完赤鮑後，將旁邊嘅鮑魚肝醬撈勻連飯一齊食真係好味到不得了，真係回味無窮。佐賀炸雞，雞好滑，師傅建議配上洋蔥一齊食，又真係好食喎。以下就係一系列壽司，首先就係拖羅啦，顏色好靚，入口即溶，喺香港冇食過咁好食嘅拖羅。鰹魚壽司，火炙過嘅，油味更香更濃。呢個海膽貫真係不得了，海膽成座山咁高，山頂仲有隻牡丹蝦。海膽非常甜又滑，側邊嘅三文魚籽超級爽，又係甜甜地嘅，配上飯一齊食真係頂瓜瓜。最後當然要食甜品啦，蜜瓜好甜好多汁，為呢餐畫上完美嘅句號。