神木日本料理 (已結業)

好耐冇出街食晚飯，上星期六約咗朋友去觀塘嘅神木日本料理食和牛。價錢相當合理，本身朋友講個燒肉餐要$688，我覺得OK但唔算好平，但原來係$688兩位！超值！日本A4鹿兒島薩摩和牛套餐 （二人前）$688呢個餐有好多嘢食，勁抵！一開始有四款前菜，有我最中意嘅螺肉十分開胃。之後係刺身拼盤，有一人一份嘅三文魚、帆立貝、馬刀貝、赤貝、有頭甘蝦。食落都夠新鮮同清甜，貝款都好爽口彈牙。至於五款日本A4鹿兒島薩摩和牛，分別係A4肩胛肉眼芯、A4羽下、A4肩胛上蓋、A4肩胛肉同A4肉眼上蓋。本身覺得價錢都抵食，上到嚟見到份量每樣都有厚厚嘅五舊真係超抵。紋絡靚油花都好足夠，A4和牛同平時放題嗰啲真係好唔同。唔會太鹹，燒一燒就可以食，A4肩胛上蓋最肥美，有種入口即化嘅感覺。最後仲有甜品，係雪糕嚟～追加海鮮/小食任食任飲 ($88)海鮮有鮑魚、扇貝、大蝦、蜆同聖子。仲有好多小食，勁多炸物食，同埋有汽水任飲。我覺得佢嘅炸餃子同炸蠔幾好食，不過我最中意嘅都係炸雞粒，多汁又夠脆。店員好友善，每枱都有抽煙系統，仲有圍裙著唔怕彈污糟。我見午餐嚟食都好平，仲有啲一人燒肉套餐食。之後可以多啲嚟！