莫老爺桂林米粉 (已結業)

得知深水埗開咗間桂林米粉並且主打脆皮五花肉，心諗唔使再淨係掛住元朗嘅陸記，九龍終於都有得食。個湯同個粉都係冇問題嘅，配料多而且令口感更豐富，只不過敗筆在於其主打嘅脆皮五花肉，好薄，碗粉上到檯嘅時候啲脆皮已經唔脆，又腍又奀，而肥膏同肉嘅比例就直情係九比一，得肥羔，見到有少少肉質但係咬落去都只係感覺到係肥膏，總之就係唔好食，而且店員亦懶懶閒，我揚手佢行過都見唔到，落單時亦沒精打采。如果有心想進步，真係希望向元朗陸記絕代雙豬粉學習，人哋脆皮肉夠厚，脂肪同肉嘅比例係層次分明，而且啲脆皮即使係浸係湯入面，食到尾都仍然保持到脆口。