湯煲私房火鍋 (已結業)

我有朋友真係好鍾意打邊爐，酷熱天氣晚上去咗呢間上環打邊爐店，呢度湯底好有特色，有好多種新奇選擇。今日就叫咗冬瓜水鴨煲，湯底嚟到即刻先飲幾碗，覺得湯頭非常之清甜透徹，陳皮味清香，冬瓜夠清甜，加埋熬咗好耐嘅水鴨，湯水充滿鴨嘅精華，味道濃郁又清甜，幾適合炎熱的夏季，消暑解膩。而且熬製鴨腿肉一咬就開，非常美味，份量大份，吃完都飽一半。配料叫咗個雙拼丸有蝦丸同帶子丸，帶子丸裏面除咗一粒粒嘅帶子肉仲有竹笙喺裏面，食嘅時候口感特別爽脆，呢度嘅丸全部係自家製作，所以用料十足，新鮮又彈牙。鱔片夠新鮮，肉質爽脆，油份夠又無泥味呀。日本味增大根黑豚肉餃子，又係自家製餃子，入口味道清甜，味增加上大根，有另一番甜味。蔬菜拼盤有菜心，白菜，唐生菜及芥蘭苗，兩個人份量啱啱好，又可以試多幾種菜。仲有自家製嘅烏冬，烏冬入口彈牙，口感滑捋捋，因為自家製嘅關係，店員特別吩淥5秒就可以即刻食。醬料除咗正常嘅醬料，仲有特別蝦醬，係用咗蝦子蝦油蝦頭及蝦膏去熬製，所以充滿鮮味，個人覺得配合海鮮，味道就鮮上加鮮。