泰海鮮 (已結業)

入冬最凍一夜，加埋風雨，依據無阻揾食的一顆心。搭輕鐵去三聖食海鮮，醒唔起喺有個三聖站，傻傻咁去錯左屯門碼頭站。唔通潛意識覺得碼頭先有海鮮食？事不宜遲，先去海鮮街買食材先。隨機揀左間。總共買咗四樣，包括蝦十両、大瀨尿蝦兩隻丶膏蟹一隻、六頭鮑魚兩隻，約$550。然後交俾<泰海鮮>加工。原來三聖㗎海鮮加工店多數都喺冬菇亭，甚有地道風味。喺呢個冷雨夜坐户外的我，好彩都有枝暖燈照著。白灼蝦。本來指定要九節蝦，但由於售罄，就買左另一種不知名蝦。游水蝦真喺無得頂，肉質爽口，最喜歡連蝦頭㗎膏同食。點埋辣豉油真喺一人食一碟都唔夠。椒鹽瀨尿蝦好巨型呀！炸到連殻都卜卜脆，個殻都好易剝，如果手殘㗎，亦有鉸剪幫手。椒鹽入哂味，大大啖咬真喺好過癮。薑蔥炒蟹不愧為膏蟹，啲膏多到滿瀉，成個蟹蓋都喺。而且蟹身肉質結實飽滿，但相反蟹腳就無乜肉食。下次試下清蒸，鮮肉應該會更突出。陣皮蒸鮑魚通常食開細細隻㗎蒸鮑魚仔，今次黎個蒸六頭鮑魚，真喺不得了。由於size大左好多，更加食到佢彈牙㗎口感，完全唔韌，加少少豉油清蒸更加帶出鮮味。幸福感UP~❤️加工費連茶芥等約$280。新鮮食材加適宜烹調，今餐要大叫好味道。