泰道 (已結業)

肥妹仔近排同屋企人多咗出街食飯，今次就去咗位於西貢嘅一間泰式餐廳。肥妹仔未去之前已經聽講呢一間餐廳除咗泰菜做得出色之外，原來佢另一個賣點就係佢有一個無敵嘅海景，肥妹仔見到都非常心動，決定今晚去試下。小食拼盤  $148呢一個小食拼盤有香茅雞中翼，魚餅，蝦餅，素春捲各四件 呢一度嘅炸物做得非常出色，因為炸到香脆可口，雞中翼好香香茅嘅味道，雞肉嫩滑，而佢嘅蝦餅同魚餅唔係淨係得粉漿，食得出蝦同魚嘅鮮味。另外佢嘅素春捲入面亦都好多蔬菜，點泰式辣醬，甜甜酸酸，非常滋味。烤薄餅  $32呢一個烤薄餅係用嚟點咖哩海鮮用嘅。薄餅烤得香脆，充滿牛油香，不錯。椰汁雞湯  $148食泰菜時候好多人都會點冬陰公湯，但係肥妹仔今次就點咗呢一個椰汁雞湯。椰汁雞湯好濃椰奶味，帶少少酸，入面有好多雞肉，香茅葉同其他香料等等，飲落去口感非常豐富， 令人驚喜。咖哩海鮮  $158我哋叫咗呢一個黃咖哩煮海鮮，海鮮配料入面有青口，魷魚，鮮蝦等等，非常豐富。佢嘅黃咖哩係唔辣，偏甜，但係又係好香椰汁味，點烤薄餅超級好食。泰式香燒雞  $168呢一個係店員推介，佢話落咗order之後都要等20分鐘，肥妹仔就叫咗呢一個燒春雞嚟試下。