香港洲際酒店宴會廳 (已結業)

星期六去飲結婚喜酒,聽人講話洲際幾貴好,連陳慧琳都係果度擺,所以期望好高,點知同想像中好大出入,質素比某d同級或較低級既酒店仲差!第一道當然係乳豬,但係個皮全部都唔脆架!肉又鬼死咁咸,勁唔得囉!第二道唔記得係乜喇,第三道就係炸海鮮卷,每人分兩件,裡面求其有d魚肉,蝦肉,蜜桃粒,但係個皮太厚喇!然後係翅,不過係豬肉絲多過乜既翅!再有鮑片同菜啦!一人一作鮑片,算係ok!再黎係露筍加蘑菇,一般啦!魚就唔太掂,可能係剛剛分俾我果份唔係咁好,多骨少肉,厚口,唔知點咁…炸子雞反而好少少,好在個皮都脆,肉唔肥,都唔錯!炒飯係菠蘿鴨胸粒飯,幾清幾好味,但食慣味濃的人,可能會覺得淡而無味,不過岩我胃口囉!估唔到有飯又有麵,唔係二揀一,係人人有份,永不落空,但係大家已經好飽,似乎太多了!呢個只係粗湯麵,加左一條菇絲咁大把,唔要都得啦!甜品有湯圓紅豆沙,無起沙,少紅豆…仲有鴛鴦美點,係一個唔知乜既中式甜品同芒果布甸,前者較好味,有咬口,外硬肉軟,有少少似月餅味,但係好的骰,不過我食唔出用乜做,亦唔知個名;後者一般,幾好味!服務唔得,唔似大酒店,d侍應手勢竟然有點粗!吃了一驚!