泰濃麵 (樂道)

營業中

休息中

呢間泰國菜館有多款泰國特色飲品，除咗有青檸梳打之外， 仲有平時未見過嘅香茅班蘭梳打。每款梳打飲品都選用咗泰國出名嘅樽裝梳打水，包保夠氣，飲落夠「gur」。青檸梳打用咗新鮮嘅青檸汁，味道唔假又夠清新。 至於香茅班蘭梳打香茅味突出，非常有泰式風味，嗒真d仲慢慢滲出斑蘭嘅香氣，好飲又夠特別。另外呢度嘅泰式鳳爪沙律相當開胃，皆因味道調配得相當好，青檸汁嘅酸， 加上咗椰糖嘅甜，同魚露嘅鹹香，食起來相當醒胃。泰式鳳爪夠彈牙又夠爽脆，配埋洋蔥芹菜一齊食，口感味道一應俱全，絕對係高質素嘅沙律。嚟到呢度嘅重點泰式船麵，泰式船面係泰國水上人嘅特色麵食，味道出名夠香濃，最啱就係重口味嘅朋友。今次我選擇咗船湯配以頂級安格斯牛肉金邊粉，船湯用咗大量牛骨淆製，湯頭呈現深啡色，一口呷下，就能感受到牛肉嘅香濃味道。頂級安格斯牛肉果然名不虛傳，用熱湯浸一浸直接呈現粉嫩嘅啡色，入口即溶，肉質嫩滑，而且牛味濃郁。冬陰功煙鴨胸湯河粉，碗河粉一放低已經聞到好濃香嘅冬陰功味，呢度個冬陰功湯味道獨特，比起坊間一般嘅多咗一份鮮甜味道，配菜方面種類繁多，有蝦，青口，蜆，蕃茄同秀珍菇，最特別嘅係佢竟然有條秋葵喺入面，夠哂健康。