泰皇閣泰國菜館 (已搬遷) 新店位置

店內貼滿晒唔同菜式嘅相,一路睇Menu一路睇相揀心目中想食嘅泰菜。見到依張古法秘製鰂魚沙律嘅相嘅時候就覺得好吸引,估唔到上到枱見到好大碟賣相仲更吸引。依個絕對係一碟好考廚師功力嘅沙律,因為要成條魚起晒肉再拎去炸。炸魚食起黎超方便又香脆,而且又啖啖肉再配埋酸酸甜甜帶有少少辣嘅沙律同醬汁,超開胃而且送飯亦一流。我見有幾枱客人都叫左依碟檸檬燒牛肉,老闆亦推介話係招牌菜,我就一於試下。燒到粉嫩紅色嘅牛肉燒得啱啱好,好嫩好juicy。配埋以大量蒜蓉,辣椒同檸檬汁所調製而成嘅醬汁,酸酸辣辣好惹味。馬拉盞炒椰菜苗係男朋友每次見到Menu上有就一定會叫嘅菜式之一。微辣嘅馬拉盞令椰菜苗顯得更香口惹味。