真心泰國菜館 (已結業)

今日小兒又要去朗豪坊睇巴士模型，所以去咗朗豪坊，行完大約6點左右，又要揾野食，老婆話想食泰菜，醒起附近有間泰式餐廳開咗好多年，上咗去試。餐廳環境以擺設，裝修都以泰式風格為主， 感覺舒服好坐。 餐廳員工都係泰國人為主。餐牌嘅選擇都好多，應有嘅泰國菜都有。冬陰功(s)去食泰國菜當然要飲下冬陰公喇，呢個冬陰功用原隻大蝦，菇，南薑，香茅，辣椒等造成，辣味好足夠，辣得來唔會遮蓋咗青檸檬嘅酸味， 幾開胃。菠蘿海鮮炒飯呢個炒飯用咗好多不同嘅配料， 我哋差不多食到落嚟先可以完全數得出有幾多種， 海鮮，肉鬆，腰果，菠蘿 ，提子乾，雜豆， 仲有一種類似臘腸嘅肉粒，我哋問店員， 店員稱原來泰國都有一種好似中式臘腸嘅臘腸， 因為用咗咁多材料所以味道方面都好豐富， 應該用咗少少黃薑粉調味。泰式小食拼盤(大)春捲係用粉絲，木耳絲，蘿蔔絲 ，肉絲嚟做餡， 幾豐富。蝦餅炸得好脆身， 裏面嘅蝦膠彈牙。魚餅係冬陰功味嘅裏面有幾款香料。雞翼炸到有少少脆，有少少香茅嘅味道。Singha 泰國啤酒我之前都未試過飲泰國啤酒，今次試下，幾 ok,易入口，唔苦， 夠凍。