吉壽日本料理 (已結業)

有時唔想咁肥，就同朋友中午去食放題，又可以滿足自己想食好多唔同種類食品嘅慾望。好彩旺角區嘅吉壽平時都做緊午市嘅放題，因為有好多放題餐廳午市放題都只係做星期六日，星期一至五係完全沒有午餐放題。甜蝦非常鮮甜，仲有三文魚、劍魚腩好肥美，魚油十足又彈牙。海膽手卷都估唔到幾鮮甜，紫菜爽脆而且不會大大件，食完都唔飽，可以再食下其他嘢。芥末有分三種辣，比較有特色。有幾種好有特色嘅壽司，全部都係混雜多幾種唔同嘅魚類一齊，配上嚟細細件唔會好飽之餘仲有好豐富嘅味道和口感。牛乳海鮮鍋唔係個個都食，因為覺得放題食呢啲嘢會好飽肚，我就覺得不錯，味道香濃而且海鮮鮮甜，啲菜都吸晒牛乳嘅香味。芝麻雞翼同埋菠蘿呢啲就係放題一定要食嘅，芝麻雞翼表面充滿芝麻香口之餘味道都比較勁，仲能夠保持裏面嘅肉汁。菠蘿就可以中和一下，減少油膩感。最後食返個自家製雪糕，一邊係士多啤梨味一邊係雲呢嗱味，甜得來味道香，仲可以加啲朱古力碎片係個表面，食完就真係超飽。