祥興記上海生煎包 (已結業)

記得第一次食祥興記係以前舊同事買返工請我食，當時一試就愛上，後來發現原來荃灣都有分店，自然成為常客，前排家姐喺國外返嚟，行完街專登帶佢去食。食物選擇唔算多，以生煎包做主打，仲有幾款冷盤同湯粉麵，價錢合理。招牌生煎包係2016年米芝蓮推介，質素自然有保證。門口有大大個玻璃窗可以睇到製作過程，雖然見唔到佢即場包，但望住佢將啲生煎包落鑊半煎炸，都已經好吸引，而且成個過程非常開放，感覺相當衛生。我哋叫咗招牌生煎包，三十蚊有四隻，價錢合理。咬開薄薄嘅外皮，入面充滿肉汁，又鮮又濃，食嘅時候要好小心，一個唔覺意好容易辣親嘴，飲完湯汁之後一啖食哂佢，非常有滿足感，最鍾意佢香脆嘅包底，配上肉餡同黑白芝麻非常滋味！每隔一排就會諗起佢嘅生煎包，總係心思思忍唔住再嚟食，簡直係我嘅「comfort food」！