明記雞雜粥 (已易手) 新餐廳

今晚嚟到油麻地，原本都想食出晒名嘅四季煲仔飯，不過實在太多人排隊嘞，所以第一站都係過去食有一排都冇食嘅雞什粥 ，呢間店都食過好多次，裝修欠奉，純粹以食物取勝，我哋叫咗每次必食嘅： 樣樣齊雞什粥：叫咗唔駛一分鐘即刻有得食因為佢係放材料然後淋粥底就搞掂上枱嘅！材料好足，有豬肚、豬粉腸、豬生腸、雞件、雞腸、雞腎、雞子、雞心、雞膶、真係乜什都有啲，成碗料多過粥份量都唔嘢少！雞件幾滑，雞腸同豬生腸都好爽彈，其他內臟亦夠新鮮，味道真係唔錯！粥底雖然唔係太杰身，但勝在夠綿，保持到水準，雖然加咗價，但係比以前大碗咗咁就冇乜所謂嘞！ 豬膶腸：次次夜晚嚟阿姐都係即拉嘅，睇佢拉腸粉拉得咁熟手，等十五分鐘都係一種享受！腸粉啲皮拉得好薄透晒光，豬膶好多好足料仲好鮮味，豉油亦溝好正，趁熱食真係好得， 所以次次都會叫！雖然內臟食得多係冇益，但係好食嘅嘢大多數都係唔健康嘅，偶一為之也未嘗不可丫！