沙田凱悅酒店咖啡廳

營業中

休息中

這酒店應該唔係開咗好耐，都幾新淨。餐廳樓底幾高，加上開放式廚房配置，令整體感覺更有空間感。或許餐廳生意不俗，座位setting較迫，要扣分。餐湯及冷盤：中西餐湯一般喇，無乜特別。西式冷盤有數款沙律配菜(料)、Parma Ham蝦、青口、翡翠螺等等，都幾新鮮。日式冷盤有壽司及刺身，選擇唔多，質素可以接受。熱盤：有三至四款意粉，紅汁白汁，長條扁意粉任君選擇。燒烤部提供各式燒烤美食，以腸仔串燒為主。旁邊有燒牛肉供應，夠腍夠juicy，有肉香，可以encore。除此之外，亦有數款點心、燒味及粉麵供選擇。叉燒的確唔錯，不過未算頂級。甜品及餐飲：甜品選擇同樣不多，有窩夫、各式蛋糕、雪糕、糖水等，味道合格喇！至於餐飲，凍飲竟然要加錢？！恕小弟見識少，係酒店食自助餐都係第一次遇到哩個情况！總括而言，餐廳環境、服務及食物質素都OK嘅，只是食物選擇較少。午餐價錢約$270一位，略為貴了一點。