Here Thai Market

沙田呢間泰菜開業以來我都食過幾次lunch，lunch set 抵食之餘水準亦不錯，見夜晚有做二人餐，包多款食物又抵食，所以就同朋友嚟試晚飯！

首先前菜有泰式生蝦，生蝦新鮮彈牙，另外仲有迷你蝦多士，炸得酥脆鬆軟

泰式海南雞半隻份量都唔少，肉質嫩滑，配上酸辣泰式醬汁夠晒惹味

二人餐都有泰式鍋滿足晒我火鍋癮！湯底似平時食船麵湯底味，配料有大量豬肉丸、蘿蔔，全餐飯熱住煮到入晒味

仲有鑊氣十足嘅炒通菜

大大杯嘅青檸梳打跟餐送

最後甜品有驚喜，係泰式珍珠奶茶布丁，布丁係濃濃嘅泰奶味，配上煙靭嘅珍珠，配搭有趣又好味！

整體而言二人餐相當抵食，有多款食物份量又多，對得住個價錢！