祥景茶餐廳 (已搬遷) 新店位置

自細跟家人多數去茶餐廳食下午茶，好多餐廳既牛肉麵都食過，都係覺得呢間最好味。一坐低，首先會俾杯茶你解解渴，雖然唔係咩大動作，但而家越來越多普通餐廳都無呢個習慣，呢點值得欣賞。之後落完order，食物就好快送上，仲要水準十多數來保持不變就好難喇，祥景就無問題。佢個午餐，係火腿庵列+牛油方包+沙爹牛肉意粉+飲品，唔單止意粉可轉通粉、麵或者米粉，連沙爹牛肉都可轉叉燒、腸仔、火腿，呢點相信好多茶餐廳都唔得喇。佢既沙爹多年保持水準，唔會太辣但亦有沙爹味，連我女朋友唔食得辣既都食到停唔到口，可想而知有幾滋味。佢既涷奶茶亦值得一讚，雖然偶爾會落多左少少奶，但好有茶味。好多茶餐廳既涷奶茶都唔夠茶味又或者次次都奶多過茶，但祥景都保持得好好，而且又唔會太多冰，飲完剛剛好。其他既蛋撻、自家制麵包都唔錯，但因為我主要都係食佢既午餐所以不加評語了，食得比較少嘛！行過良景既可以一試，雖然價錢都成差不多三十蚊(凍飲加兩蚊)，但以茶餐廳而言算合理，而且沙爹牛肉麵的確係好食，推介之選。