呢日相約朋友嚟試吓呢度嘅避風塘炒蟹，果然名不虛傳，兩人都食得舔舔脷，平時講唔停口嘅我地都逐漸靜了，各自專心噉品嚐辣蟹嘅風味～
餐廳都唔細，好闊落。
呢度以酒樓形式運作，會畀茶飲，另可額外點汽水等飲品。
蝦球好大舊又爽口，配上鹹蛋黃脆脆好香口但又唔會好油膩，另有一小碟沙律都好夾味。
輪到主角出場喇！賣相精緻，未見過咁大隻蟹！炸蒜都好多，夠哂鑊氣。呢度好細心咁切開咗蟹鉗，方便我地拆開嚟食，估唔到入面咁多肉！一梳一梳噉，好鮮甜～大家都好專心噉食，好快就食哂。
食哂啲蟹仲剩返好多炸蒜，所以都加咗啲落炒飯度，令味道更惹味～個人好鐘意芒果同炒飯嘅配搭，味道清新又唔溜。
呢道菜夠哂色彩，用小唐菜頭切成玫瑰花形狀好有創意，南瓜蒸得好軟熟但唔會熟到爛，而且仲有好多唔同嘅菇，清淡又健康～
