新泰東南亞餐廳 (已搬遷) 新店位置

對於泰國菜既喜愛，基本由細到大都有增無減，一個月食好多次我都唔介意架😏新泰東南亞餐廳好似都幾多人食，我又同朋友食下有咩出色之處吸咁多人黎食~精緻幼細既蛋「巢」，包裹住炒得條狀分明既金邊粉，蝦既份量唔吝嗇，而且爽口大隻，撈埋花生同青檸汁食更加開胃。熟悉我既朋友都知我好鐘意飲椰青，呢度既椰青沙冰實在唔可以唔讚，椰子冰雪得夠冰凍，雖然雪成沙冰，但依然維持到椰子水既清甜味，而且口感非常細滑，舒服涼快。蒜蓉牛油雞翼啲雞翼金黃酥炸，肥大多汁，滿滿蒜蓉牛油香，於味蕾揮之不去，果刻只想獨霸啲雞翼唔想同朋友分享。平時食泰國菜甜品食黎食去都係芒果糯米飯，椰汁糕，反而呢度有呢2樣以外既甜品叫，南瓜布甸好吸引我，南瓜上既布甸蛋味濃郁，相當滑嫩，南瓜綿密香甜，若連熱辣辣既南瓜一齊食更有風味。