上海小南國1987 (已結業)

一個好耐冇見嘅朋友由國內返嚟香港，可能小南國在國內都好出名，所以佢揀呢一度同我食飯。我之前每年喺沙田拜完山之後，都會去沙田嘅分店，因為比較容易搵位同埋坐得舒服一啲。一直以來佢哋食物水準都唔錯，我特別欣賞椒鹽小黃魚，皮脆肉嫩，味道甘香，除咗大嘅主骨之外，其他嘅小君全部都可以食埋。今次係尖沙咀呢個分店，都保持到同一個水準。賽螃蟹亦都係一個唔錯嘅選擇，蛋白炒得好滑，加埋醋後送飯一流。熏魚都係炸過嘅魚，但始終比較大條，啲肉冇小黃魚咁滑，而配搭嘅豉油亦都鹹咗少少。基本上尖沙咀中心嘅餐廳人流都係比較少，傾計食飯一流之選。