茶墨 (已結業)

同男朋友經常喺尖沙咀呢邊行街，講真尖沙咀其實台式飲品嘅舖頭唔多，而茶墨係其中一間比較出名嘅舖頭。呢度主打水墨風嘅飲品，所以我哋就叫咗兩杯算係比較多人飲嘅飲品。麻薯芝麻烏龍鮮奶茶呢一杯就係其中一杯水墨風嘅奶茶，你會見到佢嘅顏色係黑白相間，啲芝麻醬整到好似墨水咁，喺個杯度描繪左好靚嘅顏色。當然個樣好靚，味道都唔會輸，呢杯飲品最特別就係佢有好濃嘅黑芝麻味，而且我都好鍾意食佢個麻薯，煙煙韌韌，令成杯飲品有更加多嘅口感同層次。紫薯鮮奶另外我哋仲叫咗一杯紫薯鮮奶，我覺得呢一杯飲品令我好驚喜，因為佢飲得出係加左真材實料嘅紫薯，紫薯味好濃好突出，如果鍾意食紫薯嘅朋友一定要試下呢杯紫薯鮮奶。日式奶茶蛋糕呢間舖頭除咗飲品之外，仲可以叫雪糕同蛋糕，我哋就打算試下呢個日式奶茶蛋糕。點知飲完兩杯嘢飲已經好飽，好彩店員一早幫我地將個蛋糕打包，所以就可以拎返屋企食。蛋糕味道都唔錯，有好香嘅奶茶味。