蝴蝶泉雲南過橋米線 (已結業)

有次去附近做野見到呢間舖，用雞湯做招徠，啲餸又有得揀金華火腿，就專登搵一晚放工去試吓。去之前睇過食評網，全負皮，咁有趣，更加要試吓佢有幾差啦！大約8點去到，又係包場，真係一個客都冇，嗌咗個金華火腿搭醬燒骨米線，小辣。點菜果陣已經問過佢醬燒骨係咩黎，佢話即係金沙骨，上菜果陣骨同麵分開裝，呢個絕對係加分位黎。碗麵有啲肉碎喺面，賣相其實都唔差，啲肉碎仲係本身有味架添，算整得幾有誠意啦。飲一啖湯，實有味精架喇，但食完之後唔係太頸渴，唔算重手啦。金沙骨真係好食，醃得唔太咸，食落唔係凍肉級數（冰鮮定新鮮就唔識分喇），已經收貨，反而本來最期待要食嘅金華火腿就好一般，份量唔少，但個味道咸得黎好化學，好死實。總括黎講，不至於全負皮咁差嘅，但價錢真係偏貴，兩餸麵加罐可樂成60蚊。仲有一個令我blacklist嘅缺點，係冇水供應，我認為食肆有水供應係基本野黎，就算你有叫野飲，食完野都一定要浪口啦。