味道樂居酒屋 (河內道) (已結業)

呢間啲嘢食樣樣都好有水準！我哋先叫咗佢哋好出名嘅火炙北海道帆立貝蟹膏卷，啲帆立貝同蟹膏好夾，食落啲鮮味出晒嚟，下面嗰卷有紫菜有蟹柳仲有啲醬汁調過嘅飯，加埋一齊食真係鮮美嘅極致！值得一提嘅係個赤蝦壽司，蝦身非常厚肉，差不多包曬成舊飯，食落啖啖好滿足！火炙三文魚腩都好出色，最欣賞係佢嘅壽司飯係用特製嘅醬汁調過，所以唔係剩係得酸味，每次食落都有驚喜嘅感覺！清酒煮大蜆嘅清酒都相當鮮甜，亦都隻隻飽滿，正！仲有就係蒜香鹽燒赤海蝦，係我非常之推介，因為就咁睇個樣都睇得出好有誠意！隻蝦非常之入味，燒到蝦殼脆身，蝦膏亦都好濃郁，再滴上少少檸檬汁提鮮！真係超好味！佢嘅日式炒野菜，都係絕對不容忽視，當食完啲重味嘅嘢，再食返佢呢個野菜中和一下，佢炒出嚟嘅味道係同我喺沖繩食嘅味道好相似！仲有佢個軟殼蟹手卷，軟殼蟹相當脆，再加埋佢有大量嘅蟹子，食落去嘅口感一流。仲可以食到比較少有嘅池魚壽司，每一舊都係厚切，肉質鮮嫩而且彈牙，係上盛嘅食材！所以整體來講，呢間舖頭好值得支持！