七福神和食亭

營業中

休息中

早排聽同事講公司附近開咗間日本料理，星期五放咗工就約埋屋企一齊去，上到去個環境好舒服，職員好禮貌。前菜個豆腐同個花螺都好好食，個豆腐好清甜，個花螺就好鮮好入味。刺身先睇個賣相已經好吸引，每一塊都好厚，然後食落口真係鮮甜，有啲仲入口即溶，值得一題吞拿魚係冇得彈。至於燒物就係一份牛舌，牛舌配搭埋醬汁，成件事好和諧，好入味。小卷同壽司方面都好好食，特別個海膽，真係好新鮮，店員話佢哋係用北海道海膽既。湯就係蜆湯，成碗湯唔油膩冇味精咁，蜆肉都好鮮味。最後甜品就係生果，值得推介嘅就係蜜瓜，因為比起坊間嘅蜜瓜係甜好多。臨走嘅時候見到原來餐廳已經多年成為米芝蓮推介餐廳，唔怪之個水準咁高啦。