黃珍珍泰國菜館

營業中

休息中

黃珍珍係香港開左廿幾年，真係細細個就聽過佢個名喇，今日放假同朋友去開九龍城，就試下有咩咁巴閉。三個人叫左四樣野食，份量岩岩好唔會太飽。馬拉盞通菜 :食泰國菜必點菜式之一，通菜用微辣既馬拉盞炒得香口，唔會炒得太老，食落仍然鮮嫩，但同一般炒通菜一樣，食到最後都係比較油膩。串燒沙嗲 :雞同豬每樣叫左三串，咁每人可以兩樣都試下。串燒即叫即燒，上檯時香味濃郁，點埋秘製沙嗲醬，兩串真係唔係幾夠喉。泰式炒金邊粉 :除左菠蘿炒飯，炒金邊粉都算係比較熱門既泰菜。金邊粉配料豐富，有豆腐干，芽菜，肉片同花生碎，撈埋一齊食，感覺好滿足。青咖喱雞 :咖喱相當香滑，雞肉亦煮得入味，由於覺得配麵包好似更夾，所以叫左一籃法國麵包，用麵包點汁食，咁就唔驚浪費左d咁好味既咖喱汁啦。食完主菜後，覺得爭咁d野咁，就梗係叫返個甜品啦。叫左一份芒果椰汁糯米飯，芒果鮮甜，配埋我最愛既椰汁糯米飯，為呢餐泰國菜畫上完美句號。