養心殿台式養生鍋 (已結業)

佐敦一向多好野食，今次同朋友去相約去養心殿，淨聽名點都估唔到，居然係打邊爐。養心殿個個鍋底睇落都好滋補為主，連名都特別好聽。我地有美人鍋拼麻辣鍋，美人鍋乳白色，味道唔錯，希望食左都會變美人啦！厚脂黑毛豬梅花肉，卷得又靚又薄，比較容易熟，肥瘦均衡，落鍋迫不及待撈起，加少少豉油，充滿肉汁，果然冇令我失望！千層凍豆腐，有好多洞洞通氣，入火鍋之後會吸滿成個湯汁，入曬味，打邊爐必備。寬粉條一樣原理，但更加飽肚，湯汁精華全部吸收，味道濃郁。有鴨血送，貪下口癮，仲有手切牛肉，比起豬肉厚，但肉味更濃，入口即溶。我地今餐人均三百幾，大家都滿意，食物質素同環境都唔錯，鍋底新奇，又唔太熱氣，推介比大家！