潮薈館

營業中

休息中

今日約咗朋友去九龍城一齊食晚餐，咁啱大家今日都有打算食中餐嘅興致，所以就搵咗呢間潮州菜館。餐牌上面嘅選擇都幾多，大部份平時熱門食開嘅潮州菜式都有，仲有師父喺度斬料！《砂鍋瑤柱粥》$138我哋嗌咗個例牌。太耐冇食砂鍋粥而且香港唔係周圍都有得，難得有一定要試吓，佢嘅款都幾多。第一次食潮州嘅粥，原來唔係煲到爛晒，仲係一粒粒咪咁但係好有咬口！而且瑤柱都好足料，仲有魚乾係入面，味道好豐富！《汕頭蠔仔洛》$108食潮州嘢點少得蠔餅，呢個蠔餅都有大排檔風味，脆口，蠔味鮮又多，正！《滷水鵝片》$158食滷水點少得滷水鵝！師父嘅刀工好好，每一片都好平均好薄，食落一啲都唔會乾身，仲滷得好香好入味！《川椒炒雞球》$118一開始以為會好辣，但原來一啲辣味都冇，係用川椒鹽去炒，所以出到嚟都幾香，雞球掛汁，嫩滑又入味，推薦！ 總括嚟講，呢間潮州菜館質素唔錯，值得再嚟。