Amici (已結業)

喺中環有好多嘅西式餐廳，我哋呢次就揀咗呢間Amici European Cuisine。因為佢哋係樓上鋪，會較為隱蔽，但佢哋有好多人食過都極力推介，所以我哋呢次都算係慕名而來。鮮帶子，吞拿魚他他：賣相好精緻，有分明嘅層次，喺帶子同吞拿魚嘅中間有一層清新嘅牛油果，可以為他他多添一份清新嘅味道之外，仲為口感層次變得更為豐富。西班牙依比利亞風乾火腿，溫泉蛋沙律：沙律上面鋪滿咗嚟自西班牙嘅黑毛豬風乾火腿，呢啲火腿經已36個月，要足36個月火腿嘅風味先夠濃，同埋油香肉味先會更加突出，配埋清新清爽嘅沙律菜，可以互相取得平衡。焗原條多寶魚：好少喺西餐會食到完條嘅焗魚，呢度用嘅魚係無咩骨嘅多寶魚，用咗檸檬、香草一齊焗，所以食落完之後無魚腥味，而魚肉好嫩滑，店員除咗細心解釋之外，仲好好人咁幫我哋將魚拆骨起肉添。虎蝦意大利粉：有一隻大大嘅虎蝦喺意大利粉嘅表面，用炭火香烤過，食到有陣陣炭火嘅香味，口感彈牙爽口，而意大利粉仲用咗豆瓣醬同埋小蝦乾作醬料配料，惹味之餘蝦味變得更加香濃。法式焦糖燉蛋：表面嘅焦糖好香脆，燉蛋好軟滑，而且甜度適中，唔會太膩。