鳥棲日本料理 (已結業)

疫情嚴重，已經幾日冇出過街食飯，今天決定約兩位姨仔一起食飯，上openrice睇吓觀塘有乜好食，大姨仔話不如試吓呢間，樓上舖應該冇咁多人啩，上到去其實都唔算少人，咁應該水準唔會太差喇!比卡豬最鍾意食串燒，呢度全部都係即叫即燒，所以要等十幾分鐘，等唔緊要呀，好過D燒定放喺度再翻熱嘅，燒菠蘿清新多汁，豬頸肉就唔會太肥，肉質好嫩滑，和牛就好重牛味，燒得啱啱好，唔韌!南蠻炸雞籃，食落外脆內嫩，咬落去要小心，雞油和肉汁會一齊溢出，仲可以點他他醬，各有勝場!大蝦天婦羅，皮薄而脆，唔會食到成口粉嘅感覺，蝦肉都幾鮮味!牛肉稻庭烏冬，牛肉份量多，熱辣辣上枱，豬骨湯底夠味，而呢度嘅烏冬好彈牙，唔錯!鳥棲豚肉炒麵，用鐵板炒嘅日本拉麵，有三色椒同美奶滋，口感唔錯好豐富!原條鰻魚炒飯，有一條鰻魚鋪面，而且唔係單薄，炒飯用返鰻魚汁去炒，所以好鮮甜，比卡豬非常鍾意!總括係一間好值得食，性價比高嘅食店，下次一定會再嚟!