漁獲浜燒 (已結業)

呢間餐廳講咗差不多大半年，終於都可以嚟試吓！今次專登揀坐喺Bat枱位置，可以睇住師傅一邊切各種嘅刺身一邊食，真係食得開胃D！今次就回咗兩樣嘢食，包括波士頓龍蝦活貝浜燒盛合同埋刺身盛合五款。另外再點咗兩杯嘢飲包括乳酸梳打同西柚梳打。點完個波士頓龍蝦活貝浜燒盛合後，我就問問職員可唔可以拎咗未燒嘅海鮮嚟影張相，淨係影相睇到都已經令到食慾大增！然後喺等緊浜燒嘅海鮮時，就睇住師傅喺到整緊我哋嘅刺身盛合五款，師傅真係好犀利，幾下刀就已經好快嘅整好！呢五款刺身包括有牡丹蝦、吞拿魚、油甘魚、三文魚同埋馬糞海膽，每樣刺身都好鮮味，而我最愛就係馬糞海膽。而浜燒海鮮就包括有波士頓龍蝦、活帆立貝、活文蛤、活北寄貝。之前未煮影緊相嘅時候，貝類真係見到個口仲開開合合，真係夠晒新鮮。最先上到嘅北寄貝，用咗清酒+海帶嚟煮，淨係飲個湯已經覺得好鮮味，而北寄貝煮到極之爽口彈牙，真係超好味！而帆立貝兩味，一隻清酒煮；另一隻牛油燒，各有特色，如果鍾意食濃味嘢嘅人，可能會鍾意牛油燒。其實每樣海鮮都好好味，真係食到唔捨得走！