茶墨 (已結業)

早幾日去The One行街，行到攰想買杯嘢飲，見到茶墨啲飲品相片幾特別，喺好奇心驅使之下，我就埋去買咗杯麻薯芋泥茉莉鮮奶綠（$39）加柚子芝士蛋糕 （$28）。坐低等咗陣，號碼牌就著燈，行去拎起我杯飲品，忍唔住要影返張相！果然同餐牌上面嘅相片一樣，似水墨畫般的藝術品！店員溫馨提示我飲之前記得要攪勻，可惜我一時忘記，就飲咗一啖，感覺只係一杯普通奶綠，冇乜特別。於是我就攪勻再飲，芋泥同奶綠混合埋一齊，飲落有淡淡的茉莉奶綠香氣，加上口感十足、味道濃郁嘅芋泥，味道即時變得有層次，兩種味道撞埋竟然都幾夾！再試埋飲品加購嘅柚子芝士蛋糕，買之前我已經知道芝士蛋糕有機會搶咗奶綠嘅味道，但我實在係芝士蛋糕愛好者，加上柚子味咁特別，我都係忍唔住要加錢試試。件蛋糕對比杯飲品，相對的骰，基本上幾啖就可以食完，$28其實都唔平。不過呢個世界唔係樣樣野都要講性價比嘅，食第一啖我就覺得無浪費到錢，柚子味香濃，唔會輸比芝士蛋糕嘅味道，太大件可能會太膩太飽，細細件剛剛好！