東歐餐廳

因為疫情關係，都有成2年無得去旅行，唯有周圍搵啲唔同國家嘅餐廳試下，食住美食當去咗旅行啦！ 今日lunch 就去中環好出名嘅「東歐餐廳」食飯，主要食烏克蘭菜。嚟到呢間餐廳，點可以唔飲出名嘅羅宋湯呢。呢隻羅宋湯同香港茶記個隻蕃茄膏溝水嘅羅宋湯唔同，係用紅菜頭同蕃茄煮成，上面再加埋酸忌廉，飲落去相比香港茶記嘅較浠，但另有一番風味😋主菜方面，我就揀咗蘋果焗鴨胸。 上主菜嘅時候，真係比佢嘅分量嚇親，完全無諗過係咁大碟，搞到我以為上錯菜。鴨胸煮得好冧，唔駛話用到好大力咁咬，浸蘋果酸甜酸甜味好出，連個鴨胸都好入味。入面仲有蘑菇同薯仔，食哂全碟絕對夠飽！喺香港無咩其他地方可以食到咁正宗嘅烏克蘭菜，絕對值得過嚟食下！