金記冰室 (已結業)

團年飯去茶記，仲要自己去買嘢去畀佢加工，真係一萬個為甚麼？！自己食飯自己揀，唯有負責到底。怕人多就早咗喺隔離楊屋道街市買海鮮，東星+南非飽+花螺+肉蟹+大蜆，9個人份量千三蚊唔算貴。上到去，老細話無魚缸，d 海鮮只可以擺喺無水嘅水桶度等，大佬，仲有成粒鐘，條魚應該好快氣絕......終於等齊人，上菜速度奇快，加工嘅海鮮：先上辣酒煮花螺，OK 喇！然後炒蜆、薑蔥肉蟹、一碟比一碟見功夫，蒸鮑魚，擺上檯就聞到陳皮香，軟身腍滑；不得了嘅係條東星，好耐無食過蒸到咁perfect 嘅，唔駛5分鐘，個碟得番豉油，加埋嗰度嘅小菜套餐，真材實料，食到魚有魚味，雞有雞味。平民茶記，海鮮做到大酒家水準，值呀！