爆丼屋 (已搬遷) 新店位置

今日木嘴經過爆丼屋之前又未試過，咁就即管入去食下睇下有幾爆法。見門口都有d人企係度，本身都諗住要排隊，但果d企喺門口既人唔知係路人甲定係茄呢啡黎，竟然一問個店員又可以直接入去喎，非常神奇。睇餐牌其實有少少選擇困難，因為選擇都幾多下，最後左諗又右諗揀左個名好勁咁既火焰盛丼同北海豐盛丼。火焰盛丼個賣相真係有爆既感覺，因為d料鋪晒上d飯上面好似就爆出黎咁。至於味道方面，重申一次作為一個真係木嘴既木嘴其實淨係講到好食同唔好食，咁我覺得係好食既，尤其d刺身火炙左幾香口，唔錯。北海豐盛丼呢個都幾好食，d食材食落感覺都幾新鮮下。另外，佢無啦啦有一包紫菜送比你，我估係撕開佢自己撒落d飯度食，希望唔好係我seven左。但大家睇相都見到d料已經鋪滿晒碗飯，木嘴其實唔係幾搵到位再落喺d飯度，唯有邊食邊落，嫌麻煩既木嘴隻手有d攰。另外仲有麵豉湯飲，幾足料所以木嘴飲完先記得影相飲。係香港食刺身丼都預左唔平，咁睇番個質素都唔錯，雖然碗野唔大，但木嘴既櫻桃小木嘴同櫻桃小木胃食完都覺得飽。不過果度既氣氛你都預左唔會坐到好耐，木嘴同朋友坐左一個鐘食完就埋單走人喇。