鐵路便當 (已結業)

喺土瓜灣附近完成補習工作，經過見到呢間新開嘅台灣便當，就入去試下。啱啱有位，店員好懇切咁招呼我坐低咗。裝修簡單但cozy，最緊要夠乾淨！食嘢選擇唔算多，便當主要都係圍繞住滷肉、排骨同雞塊，而亦有台灣大路嘅小食。我叫咗個出面較少有嘅紅糟肉便當。主菜嘅紅糟肉大大塊好多塊，便當仲配埋幾種蔬菜類嘅配菜，有蘿蔔、茄子、滷蛋等，好貼心。聽店員講，配菜每星期轉一下，為便當保持新鮮感。味道方面個人覺得幾好味。紅糟肉新鮮炸起，熱辣辣好香口。配菜亦好味，唔太咸，其中滷蛋最好味。特別欣賞飯用上日本珍珠米，幾有口感。份量方面，本人食量唔大，覺得啱啱好，大食嘅男仔可能叫多個小食會好啲。整體我好滿意今餐，算有小驚喜，得閒會再嚟。