部屋咖啡室

除左觀塘多樓上cafe，旺角都唔少。去開旺角買野，就去左登打士廣場既樓上cafe。一入到去氣氛好熱鬧，旁邊放左board games, card games比客人玩，好適合一大班朋友或同學聚舊。我同朋友叫左2人餐，性價比超高，$300就有小食，一個10吋pizza，主菜同兩杯飲品，平過單叫好多！小食係炸蟹餅，上枱時仲熱辣辣架，即叫即炸！有淡淡既蟹肉味，配上泰式辣醬後更惹味。pizza就揀左辣肉腸pizza(10吋)，我特別推薦呢間cafe既pizza，因為佢唔似出面既pizza焗完又乾又硬，佢啲pizza焗完都好濕潤，好易入口，而且餅底吸左醬汁特別入味。上層鋪左芝士，份量好多而且可以拉絲架。不過後來放涼左就拉唔到絲，建議大家食左pizza先。主菜叫左烤雞意大利粉，有好多件烤雞，外脆入嫩，食落多重口感。意粉都同樣出色，忌廉汁包住意粉好入味，而且麵條既軟硬度適中，有咬口，算係好高質既意粉。飲品方面叫左兩杯凍朱古力(一杯焦糖味、一杯榛子味)，我地叫左少甜，甜度剛剛好，朱古力好香滑而且好濃，杯邊用朱古力醬簡單裝飾，賣相靚之餘，味道都唔錯。